|
- Amuninni, sùsiti!
- Unni mi porti?
‘Nti ‘n postu beddu, ca c’è ‘a bona sorti.
- E unn’è?
- Jàutu, ‘nti ‘na muntagna.
Ci sunu ‘mpigni e acqua: è ’na cuccagna;
‘nto puntu chiù jàutu ‘i munti Lauru,
bonu è ‘u tempu e ‘nta stati nun fa cauru;
c’è l’uògghiu bonu e è chinu ‘i ulivi;
‘nto ‘mmernu fa friddu e cari ‘a nivi;
ma i genti - ca su’ boni - pòsunu ‘u pani
‘nta finestra ‘a sira p’’o ‘n’’numani.
‘Nta primavera si sta di pararisu:
‘u cielu è blu e pari ca è appisu.
L’aria è fina e fa ciauru di rosi,
e a ‘n malatu ci passunu tutti cosi.
C’è ‘a Pruvirenzia, ‘a Mantalena e Sant’Antoni.
- Allura passa avanti e viriemu ssi doni.
E i du’ passarieddi pusanu li pieri
‘nto voscu ‘i Santa Maria. A Bucchieri.
Tanino Cannata, 2006
|
