|
Fati a limosina a Sant'Antoni, fati a limosina a Sant'Antoni,
A stu poviru munacheddu ca vieni i tantu luntanu
Raciticcilla occa cosa sustanziusa, comu iautri fanu
Mittitticcilla 'nta sacchina ca lascia ccà 'nterra,
Ne' oru né argentu, ma tuttu chiddu ca vi sferra
Lassatici pani, furmangiu, quattru cocci i ulivi
E vi livati da vostra cuscienza tutti li brutti currivi.
E se pì casu v’assupecchia occa stizza di vinu
Nun v’affruntati, c’ è u uttacciu ccà vicinu.
Pi l'uogghiu purtaiu nu bummulu, pusitamenti
Abbiaticillu a stizza stizza, senza farini cariri nenti.
Cu lu monucu di Sant'Antoni sintiti paci, prieri, cosi
di santi:
Vi lasciunu sirinità e pietà pì tutta la notti c’aviti
davanti.
Ascutatulu attintamenti, arrapitivi i sintimenti
E lassati luntana ogni tribulazioni:
U diavuluni nun vi purtirà 'ntentazioni.
Mittitivi comodi, ascutati a storia do tintu viddanu
Ca vulia arricchirri u iornu ca l'antichi ni sancalianu.
I ranni darrieri: senza fari rocchiu!
I nichi davanti: li vuogghiu 'nginocchiu!
Cuitati i criaturi cu ‘mpezzu i cudduruni
E se nun ci abbasta, cu occa scuppazzuni
Pè carusi tristi ca nun sentunu cumanni
Ci pensa u ma vastuni: apposta è tantu ranni!
E ura tutti pari: fati silenziu, ranni e nichi
Cumenza la storia ca cuntauunu l'antichi.
Servi po’ vostru divertimentu
E pa’ ristarivi di 'nsignamentu,
Spiramu c'abbasta po’ ma sustintamentu.
Stu poviru monicu sulu chissu vi po’ dari,
Ma mortu di fammi nun l'ati a lassari.
Va raccumannu u bummilu, u uttacciu e a sacchina
'Nmi pozzu arricuogghiri o cummentu se nunn'è china.
Turi Terzo |
